( الفتاة الهاربة ) قصة واقعيه عن بنت كويتية هربت من الدنيا الى الشارع

بسم الله الرحمن الرحيم ..


--------
نبدي



*البارت الأول*


الوقت ليل حوالي الساعة وحده ونص .. شاب اسمه علي عمره 27 يسوق اكس فايف اسود دايس ويدور سي دي راشد 2009 بين السيديات اللي عنده..
علي : ( يتحلطم ) وين راح السي دي منو ماخذه اكيد صلوح الكلب بايقة جنه مايدري ..
رفع راسه عالطريج وفجأه شاف بنت جدامه تركض بتعبر الشارع .. داس بريك بكل قوته وقف قبل لا يحوشها بأقل من سانتي واحد ..
طالعته البنت منصدمه واهو نفس الشي منصدم وماتحرك من مكانه الا يوم شافها اغمى عليها..
نزل من السياره معصب وخايف وقعد يسبها : الحيوانه مادري من وين اطلعت بهالليل ماكو ابو يمسكها ناقص بلاوي البنات آنا..


قعد يطالعها طايحه عالشارع جدام سيارته بنت حلوه بيضه تقريبا عمرها اول العشرينات شعرها لي نهاية ارقبتها ولابسه جينز وبلوزه سوده ..
تلفت يمين يسار ماكو اي احد بالشارع .. قعد يدور اذا مجروحة أو متعوره مالقى اي اثر لدم او رضوض ..
شالها وحطها وره وركب سيارته ومشى ..


قعد يقول بقلبه .. ياربي اشهالبلوة خل اوديها حق اقرب مستشفى اقطها وامشي والله انا شكو فيها اقعد ابتلش .. ومالقت اتطيح غشيانه الا جدام سيارتي ..
فجأه سمع صوت البنت : أحمد .. أحمد ليش ؟؟ أحمد ..
طالعها بمنظرة السياره لقاها للحين مغمى عليها بس شكلها تحلم ..
ولا اتقوم : انا وين؟؟ انت منو؟؟ وشتبي فيني؟؟ وين موديني؟؟
علي ( بقلبه ) : هذي اللي برفسها بالشارع الحين ..
علي : يبه انتي طالعتلي بهالليل اتقول خفاش وراكضه بالشارع وماحلالج اتطيحين الا جدام سيارتي ..
البنت انزلت ادموعها وماتكلمت ..
علي : في شي يعورج؟؟ اوديج المستشفى؟؟
البنت : هزت راسها (لا) واقعدت تبجي ..
علي: اشفيج خايفه مني؟؟ تره ما آكل انا .. وين بيتكم عشان اوصلج..
البنت : لا مابي اروح البيت خلاص نزلني اهني ..
علي : وين اهني؟؟ تره احنى الحين بالدايري السادس يعني اسفط وانزلج اهني وين بالله؟؟ عطيني مكان محدد وانا اوديج ..
البنت : زادت بجي .. مادري مادري ماعندي مكان (تبجي)
علي : هاج اكلينكس وبسج بجي وكلميني .. فكري شوي وقوليلي وين تبين تروحين اكيد في مكان معين .. انتي كنتي تركضين وين بتروحين مثلا؟؟ عندج سياره اوصلج لها؟؟
البنت : ساكته ماترد بس تبجي
علي : ياصبر ايوب .. اشلون يعني اسفط يمين وانطرج تكملين بجي وتفكرين تردين علي؟؟
البنت : تبجي وتعلي صوتها عليه .. خلاص لاتزف ماعندي مكان اروحله وماعندي سياره ..
علي : يبه انا مو قاعد ازفج بس ابي اعرف وين اوديج مايصير نفتر بالسياره بدون هدف ..
البنت : خلاص والله نزلني ماعندي مكان معين ..
علي : عيل امشي انروح كوفي بين او ستار بكس تشربين قهوه تريحين اعصابج ونفكر مع بعض وين تروحين.. احسن من ان يوقفلج ولد مو متربي ويأذيج .. اوكي جذي؟؟
البنت : ( تمسح دموعها ) اوكي..
علي : ( يبتسم ) تسمعين حق راشد؟؟
البنت : اي عادي ..
علي : شنو عادي .. تسمعين له او لأ؟؟
البنت : اي اسمع
علي : شنو تحبين تسمعيله اي اغنية
البنت : مادي والله
علي : اووو تره حدي ماحب كلمة مادري مافي شي بالدنيا اسمه مادري عطيني اسم اغنية تسمعينها حق راشد يللا فكري ..
البنت : ( فيها بجية بس ماسكتها غصب ) اغنية اللي لقى احبابه
علي : حتى انا احبها .. تبين تسمعينها؟
البنت : لا
علي : لو عندي جان حطيتها اعناد بس حسافه السي دي عند الحيوان صلاح
البنت : ساكته و اتطالع الشارع .
اوصلوا كوفي بين سفط السياره ونزل .. اهي بطلت باب السياره بس مانزلت
علي راح لي بابها وقعد (القرفصاء) اللي مايعرفها يعني قعد جنه عزكم الله بحمام عربي ههههه طاع التشبيه ..
المهم نرجع للقصه .. قعد يم بابها وطالعها (أول مره يشوفها عدل) حس ان ويهها في براءة وحلوه وايد .. عيونها كبار ورمشوها وخدودها مبللة من الدموع .. خشمها احمر من البجي .. وحلجها صغير وطامر (مرسوم)
علي : يللا نزلي ماكو شي يستاهل كل مشكلة ولها حل ..
البنت : (ساكته) وانزلت ..


اتمنى يعجبكم البارت الأول

البارت الثاني


البنت : (ساكته) وانزلت ..
دشو المحل اقعدت تتلفت اتشوف اذا فيه احد بس ماكان فيه الا ريالين اجانب .. علي سحب لها الكرسي عشان تقعد
علي : بطلبلج على ذوقي موافقه؟
البنت : اوكي
راح يطلب ورجع يايب لها كراميل كوفي ..
علي : يبتلج بارد عشان يبرد على قلبج ..
البنت : مشكور
علي قعد جدامها وحاول يلطف الجو
علي : للحين ماخلصتيه؟؟ يللا شربي لا اشربه عنج
البنت : ابتسمت واشربت شوي
علي : اي عفية عالشاطرة خلصيه كله.. زين ممكن نتعرف عالاسم؟
البنت : منار
علي : حيا الله منوووره معاج الحجي علي
منار : عيونها غورقت فجأة واقعدت اتطالع علي وانزلت ادموعها واهي ساكته
علي : اشفيج؟؟ ليش تبجين
منار : لاتناديني جذي
علي : قصدج منوره؟؟
منار : ( تمسح دموعها ) اي
علي : زين اناديج منور عادي؟؟
منار : كيفك
علي : زين قوليلي قصتج يمكن اقدر اساعدج
منار : ( هم تمسح دموعها ) ماقدر اقول
علي : زين عندج احد اوديج عنده دامج ماتبين تروحين البيت؟
منار : تهز راسها (لأ)
علي : زين شربي بردي على قلبج شوي .. زين وحده من رفيجاتج مني مناك شوفي
منار : ماعرف احد وحتى لو اعرف شقول حق اهلهم وانا رايحه لهم قريب الفير
علي : زين حاولي تمسكين دموعج و خل افيدج .. انتي ماعندج مكان تنامين فيه .. ولا تبين تقولين لي قصتج عشان اساعدج .. زين سمعي عندي حل مؤقت بس لاتقلبينها عزا وتبجين بس سمعي وقلبيها بمخج على راحتج
منار : ساكته اتطالع كوب الكوفي وماسكه دموعها غصب
علي : انا عندي شقه
منار : ارفعت راسها منصدمه تطالع علي ودموعها انزلت
علي : لا حول ولا قوة الا بالله .. هذا وانا قلت سمعيني لين اخلص ولا تقلبينها عزا .. يابنت الناس انا لو ابي منج شي مو زين جان ما يبتج اهني وقعدت 3 ساعات احاول القى معاج مكان اوديج له ..
منار : ( تبجي ) , مابي اروح مكان خلاص خلني اهني وروح
علي : ( بنبرة عصبية ) خلاص عاد لاتصيرين ياهل وبس تبجبجين على راسي .. سمعيني لين اخلص وبلا دلع عاد

--------------------------------------------------------------------------------

البارت الثالث

علي : ( بنبرة عصبية ) خلاص عاد لاتصيرين ياهل وبس تبجبجين على راسي .. سمعيني لين اخلص وبلا دلع عاد
انا عندي شقه ماخذها عشان اسويها مكتب ومافيها الا شوي كراكيب وسرير عشان لي تهاوشت مع البيت اروح اهناك .. والحمدلله انا مو متهاوش مع احد حاليا .. ( ظحك ) وابوي مسافر فتقدرين اتقولين ان حالتي مستقره واقدر اعيش في بيت اهلي
فاشرايج اوديج اهناك واروح بيتنا وتنامين وترتاحين فيها لي باجر ويحلها ألف حلال ان شاءالله.. اشقلتي؟ اول فكري عدل وبعدين ردي علي
منار : ( تسمح دموعها وسرحانه بالكوب تفكر ) وهزت راسها (لا)
علي : وقسما بالله مافيها اي احد اصلا مافيها اثاث بس قنفه بره وبالغرفه سرير وكفر ومخده وبس مافيها شي بعد , وماراح انزل معاج بعد اشتبين اكثر؟ بس اعطيج المفتاح وانتي تنزلين وباجر عالغدى اييبلج شي تاكلينه ونفكر بحل للمشكلة اللي ماعرفها ( ابتسم لها ) اوكي جذي؟؟
منار : ( اسكتت مده ) .. اوكي
علي : نمشي؟
منار : اوكي
اطلعو بره ومنار راحت صوب الباب اللي ورا
علي : ( يظحك ) قلنا بوصلج بس عاد لاتحسسيني اني سايق .. قعدي جدام
منار بطلت الباب اللي جدام واقعدت واهي ساكته ماقالت ولا كلمة
علي : ( شغل السياره ومشى ) منار جم عمرج؟
منار : 23
علي : شايله مشاكل اكبر من عمرج اشخليتي لي انا عمري 27 شايب صح؟
منار : ( ساكته مسنده راسها عالجام و سرحانه بالشارع )
علي : نحن هنا الوووو ؟؟؟ الووو ؟؟ الأرض تنادي منار حول ..
منار : ( ماترد ) .. سكت علي بعد وكمل الطريج ومحد يتكلم
بعد فترة .. وصل حولي المكان اللي فيه شقته
طالعها الا يلقاها نايمه ..
علي : منار قومي وصلنا .. منار .. (حط ايده على جتفها وهزها عالخفيف عشان تقوم ) منار قومي
منار : ( قامت مخترعه ) شنو فيه؟؟؟
علي : مافي شي بس قعدتج لأن وصلنا .. وهذا المفتاح نزلي صعدي الدور الثالث شقه 8 وانا باجر ان شاءالله وقت الغدى اييب لج شي تاكلينه
منار : ( ساكته متردده )
علي : يللا سمي بالرحمن ونزلي سبحي ونامي وباجر ما يصير الا كل خير
منار : وصلني مابي اروح بروحي
علي : اوكي عيل مشينا ( طفه السياره ونزل )
دشو داخل العماره ومنار منزلة راسها ماتبي أحد يشوفها
مصطفى (اللي واقف عالريسبشن) : ( ابتسم ابتسامه عريضه ) يا مرحب بالاستاز علي يا الف مرحب ان شاءالله ليلة زي الفل عليك يا بااشا
علي : ( عطاه خزه خلته يسكت ويحط راسه بالارض )
منار : ( كان ودها الارض تنشق وتبلعها وفكرت ترجع للشارع بس اللي خلاها تكمل ان ماكو مكان تروحله )
اركبوا الاصنصير ومحد يتكلم اهي منزلة راسها واهو ساكت يطالع الباب ناطره يتبطل عالدور الثالث بس الاصنصير وقف عالدور الثاني وصار بويهم ريالين أعمارهم بالاربعينات تقريبا .. كانوا بيركبون معاهم بالاصنصير
علي : ( وقف بويه الباب وخله منار وراه ) اسف بس اذا ممكن تنطرون الاصنصير لين يفضى ويرجع لكم .
واحد منهم : ( شكله مو على بعضه و يطالع منار ) ليش لهالدرجة مستعيل مافيك صبر جم ثانية؟؟
علي : ياحقير عدل اسلوبك انت صج مو مال احترام (توه بيطلع من الاصنصير عشان يطق الريال بس منار امسكت بلوزته حيل عشان مايروح )
الريال الثاني : ( يمسك صاحبه ) خلاص حصل خير توكلوا على الله
تسكر الاصنصير وعلي لف على منار لقاها تبجي بدون صوت
علي : ماعليه لايهمج اهم شي تنامين بمكان أمان بدل الشارع ماتعرفين منو تلقين فيه
منار : ( تسمح دموعها )
علي : اي عفية عالشاطرة
تبطل الاصنصير وراحو لي باب الشقه بطله لها وشرعه عشان تشوف ان المكان فاضي ومافي اي احد وعطاها المفتاح
علي : ياللا روحي تسبحي و ارتاحي ولا تبطلين الباب الا اذا ييت انا باجر ويبتلج غداج ماشي؟؟
منار : انا خايفه
علي : لا تخافين ماكو الا الخير .. تبين ادق عليج اتطمن ولا اخليج تريحين؟
منار : بلى دق اخاف ايي احد ويبطل الباب والله اموت
علي : ( يظحك ) لا اشدعوه وين قاعدين بشيكاغو؟؟ .. المهم انا بدق على تلفون الشقه اذا رديتي نطري لين اقول اسمج وردي علي اذا ماقلت يعني مو انا سكري الخط اوكي؟
منار : اوكي
علي : يللا انا ماشي تبين شي قبل لا اروح
منار : ( تهز راسها بالنفي )
علي : يللا عيل مع السلامه قفلي الباب عليج ( مشى ناحية الاصنصير )
منار : علي..
علي : ( يلتفت عليها ) هلا
منار : مشكور وايد
علي : ( ابتسم ) العفو ماسويت شي يللا دشي وقفلي الباب
منار : ان شاءالله ( تدخل الشقه وتقفل الباب عليها )

علي صعد سيارته و بالطريج كان سرحان ويفكر
علي : ( بقلبه ) .. انا اللي سويته صح؟؟ خذيتها وحطيتها بمكان ومحد يدري عنها وشكلها منحاشه من بيتهم .. زين انا اشدراني اذا اهي مسوية جريمة و منحاشه او مسوية شي جايد ويمكن اهلها الحين يدورون عليها زين شسوي اذا مقدمين بلاغ خطف ويقطون المشكله براسي ..
( يتنهد بصوت عالي ) .. والله مادري شسوي وهم ماكنت اقدر اخليها تمشي بالشارع بروحها لا حول ولا قوة الا بالله العلي العظيم على هالمشكلة ..
علي : ( بعصبية ) الله ياخذك يا صلاح زيين .. حدي متأزم هذا وقت أغنية (وش جاه) عشان انسى هالسالفة

البارت الرابع

علي : ( بعصبية ) الله ياخذك يا صلاح زيين .. حدي متأزم هذا وقت أغنية (وش جاه) عشان انسى هالسالفة
- - - - - - - -
( عند منار )
سكرت باب الشقه واقفلته عليها
تسندت عالباب واقعدت بالأرض لامة ركبها عند حنجها وتبجي
منار : اشلون صار جذي معاي .. ليش يا أحمد ليييش
( تبجي وقلبها محروق ) والحين اانا وين قطيت عمري مو ناقصه مشاكل اكثر ماعرف علي عدل اشلون ييت شقته اول مايطلع الصبح لازم امشي من اهني ..
قامت من مكانها واهي خايفه اتطالع الشقه لقت الصاله مافيها الا قنفه مثل ماقال .. و بخطوات بطيئة ومتردده بطلت باب من البيبان اطلعت غرفة النوم ومافيها الا سرير و ميز ادراج صغير ( كوميدينا ) عليه تلفون أرضي..
اطلعت اتدور الحمام لقت ليته مسكر بطلته بس طلع محترق ..
شرعت الباب ودشت رشت ماي على الافرنجي ومشته بكلينكس واقعدت
... وسرحانه وتدمع عينها خلصت وغسلت (عزكم الله )
وقامت تغسل ايدها لي اكواعها وغسلت ويهها بعدين اطلعت راحت الغرفه
و اقفلت عليها الباب .. انسدحت تلحفت واقعدت تبجي بصوت عالي عشان ترتاح
- - - - - -
( عند علي )
دش البيت وسكر الباب توه بيصعد غرفته ولا يشوف امه قاعده بالصاله وناطرته
( ام علي وايد طيبه وتحب بيتها واعيالها - علي وعثمان وعالية وعمر- بعدين نتعرف عليهم )
ام علي : علي؟؟ جم الساعة الحين؟؟
علي : (قعد يم امه ويبوس راسها وخدها ) مسااء الخير يا حياتي يا عمري يا احلى مريومه بالعالم كله
ام علي : عليوي ويعه وخر عني ولا تحاول تساحلني و أي مساء الحين؟؟ الساعه اربع الا ثلث اتقولي مساء .. وين كنت لي هالحزة هاا؟؟ مو علبو انت صبي ماترد الا ويه الصبح
علي : يمه راح اصك الثلاثين لي متى يعني باخذ اذن على كل شي ؟
ام علي : لين تتزوج وتريحني
علي : يمه عااد لا تصيريلي ابوي الثاني انا ماصدقت على الله سافر عشان اخذ بريك راحه من صراخه .. حياتي انتي مريوومه لا تزعلين فديتج انا وبعدين شمقعدج لي هالحزه ليش مو نايمه؟
ام علي : قعدت عشان اصلي ولا ناسي ان في صلاة اسمها الفير؟ وبعدين تعال قولي وين كنت لي هالوقت؟
علي : كنت اسوي عمل خير
ام علي : اشلون يعني؟؟
علي : ساعدت شخص لقيته بالطريج ووصلته بيتهم , يمه انا دخت بروح انام ( باسها على راسها وقام )
ام علي : يمه دير بالك حبيبي مو اي احد تركبه معاك هالايام الدنيا تخوف ماتدري منو الزين ومنو اللي ماله امان
علي : اي والله عدل كلامج ادعيلي انتي بس.. يللا انا رايح انام تصبحين على خير
ام علي : الله يوفقك ويسهل دربك ويحفظك يا بعد عمري يا وليدي زين يمه صل اول بعدين نام
علي : ان شاءالله ..

علي صعد دش غرفته وراح الحمام توضى وصلى بالغرفه وبعدين دش سبح و طلع لبس شورت وسكر الليت وانسدح قعد يفكر ب منار ..
علي : خل ادق اتطمن عليها ( مسك تلفونه ودق على شقته )
- - - - -
منار كانت متلحفه وتبجي وفجأة رن التلفون فزت مخترعة ارفعت السماعة وتمت ساكته
علي : الو منار؟؟
منار : ( تحاول تكون طبيعية وماتبين انها تبجي ) هلا علي
علي : ها كل شي تمام عندج؟
منار : اي مشكور
علي : منار فيج شي؟؟
منار : لا كل شي تمام لا تحاتي
علي : زين خفي على عينج راح ينشف منها الماي بعدين من وين نرد نعبيها؟؟
منار : ( ساكته )
علي : تبين اقولج قصة عشان تنامين ؟؟
منار : ( تبتسم وتمسح دموعها ) قول
علي : كان يا مكان في قديم الزمان .. كان في بطة حلللللوه لونها ابيض ثلجي تزوجت بط لونه اسود .. بط مذكر بطة بقاموسي الخاص .. حلوه بط مو؟
منار : ( تظحك ) اي اعجبتني
علي : ايييي جذي ظحكي والله تره الدنيا ماتسوى دموع هالكثر حدج دمعتين و وايد عليها بعد .. المهم خل اكملج قصتي يا طويلة العمر
هالبطه البيضه الحلوه تزوجت بط اسود ويابو 5 بطاطيط
منار : ( تظحك )
علي : دمي خفيف؟؟
منار : حده
علي : ياحلاتي أونس .. المهم هالخمس بطاطيط كانو كلهم بيض الا وحده سوده طالعه عالابو ( وقعد يكمل لها القصه )
علي : الووو منار .. منوور
منار : ( ماكو الا صوت نسمها )
علي : يللا نوم العافيه ( سكر التلفون ) .. والله هالبنت مسكينه الله يفرج همها

--------------------------------------------------------------------------------

البارت الخامس

علي : يللا نوم العافيه ( سكر التلفون ) .. والله هالبنت مسكينه الله يفرج همها
- - - - - -
طفل صغير اسمه عمر عمره 3 سنوات ونص دش غرفة علي ركض ونط عالسرير وقعد يناقز
عمر : قوووم عليييييي .. قوووم قوووم .. يللا قوووم علي قووووم
علي : ( يصرخ ) عموووووووووووور انزل من السرير واطلع بره لا اطقك
عمر : ماما تقووول غدا الحيييييييين بسرعه
علي : ( فز فتح عينه ) غدا؟؟؟ ليش الساعة جم؟؟
عمر ( يناقز عالسرير ) : هاا؟؟
علي : شوف من قاعد اسأل بس .. وخر عني ولاتنقز لا اطقك من صج هالمره
عمر : ( يقعد بحضن علي ويلمه ) حبييبيي علييي
علي : ( باس عمر ) عليك حركااات تخرع هذا وانت طول الاصبع يللا حبيبي روح اطلع وقول حق ماما علي مايبي غدا بيطلع بره عنده شغل زيين؟؟
عمر : هاا؟؟
علي : اووهووو قولها مايبي اكل يللا اطلع بره
عمر : زين ( طلع بره يركض )
علي : ( يطالع الساعه ) الساعه وحده وللحين مايبت لها شي تاكله خل اقوم بسرعه ابدل واطلع ادق عليها بالطريج

تحت بالصالة الصغيره على طاولة الطعام قاعدين ام علي وعمر الصغير وعثمان ( عمره 22 ) وعالية ( عمرها 17)
مر علي عالصاله الكبيره بيطلع بره
ام علي : علي تعاال اكل وين رايح ؟؟
علي : يمه والله مستعيل ماقدر معزوم عالغدى ومحد قعدني فحيل متأخر
عاليه : انت لو قايلي جان قعدتك انا قاعده اليوم مبجر
علي : مادري نسيت .. يللا انا ماشي مع السلامه
ام علي : يمه دير بالك
علي : ان شاءالله يللا باي
عثمان : يمه ابي سيارة يديدة
ام علي : يمه واشفيه الهمر ؟؟
عثمان : يمه زهقت منه وبعدين خلاص الكويت كلها اتش ثري بغير
عالية : اي يمه ييبيله بورش عشان السنه اليايه انا اسوق الهمر
عثمان : تخسييين شنو بنت تسوق همر ماكو شغل انطمي بس انتي حدج التيما
عالية : زين لاتسب
عثمان : غصبن عل...
ام علي : ( تقاطعه ) خلاااص بس عاد احترموني او حترموا النعمة شوي وبسكم نجرة
عمر : خلاااص بس نجرة
الكل ظحك على عمور وكملوا اكلهم
- - - - - - -
بالسياره علي يتصل على الشقه بس محد يرد ..
علي : ( بقلبه ) وين هالبنت ماترد .. زين اخاف ماتاكل عيش .. بس احسن من الصمون خل اييب لها مجبوس دياي احسن شي ..
- - - - - - - - - -
منار توها افتحت عينها اقعدت اتطالع المكان تبي تتذكر اهي وين
منار : ( قامت بسرعه ) جم الساعه الحين ( قامت اتدور ساعه مو لاقيه ) .. انا قلت لازم اروح اول مايطلع الصبح خل اقوم بسرعه اسبح واطلع

دشت الحمام عشان تسبح عالسريع .. اقعدت اتشم الفوطه ..
منار : والله ياخوفي مو نظيفه بس شسوي لازم اسبح ..
سكرت عليها الباب ( الحمام في نور من الدريشه الصغيره )
- - - - - - - -
علي وصل عند باب الشقه يطق الجرس مره مرتين ثلاث محد يرد
دق عليها هم ماكو رد ..
علي : وينها لايكون راحت؟؟ ( يرد يطق الجرس وناطر )
( منار توها طالعه من الحمام ولافه عليها الفوطه وشعرها مبلل يقطر ماي واسمعت الباب والجرس ينطقون مع بعض خافت قلبها بغى يوقف )
منار : ( راحت يم الباب واتشوف من العين السحريه )
منار : علي؟؟ بقلبها ( اشلون راحت علي نومه؟؟ كنت بطلع من هالمكان قبل لا يرجع )
علي : بطلي الباب العمارة كلها اسمعتني اكسر الباب وانتي ماسمعتي؟؟
منار : لحظه بس شوي وابطله زين؟؟
علي : بطليه الحين موقفتني ساعه بره خلصيني يللا
منار : ( بطلت الباب شوي وطلعت راسها وشعرها يقطر ماي عالارض )
منار : ( تتكلم واهي بتمووت من الاحراج ) آسفة بس كنت اسبح بخلي الباب مطرف و اروح داخل عشان ابدل انطر ثواني بعدين دش اوكي؟
علي : ( منحرج ) اوكي .. ( نطر دقيقة بعدين دش وشايل معاه جيس الاكل حطه عالارض وقعد عالقنفه ناطرها )

منار بالغرفه تنشف جسمها وشعرها والبست ملابسها واقعدت عالسرير اتفكر بالحاله اللي اهي فيها ووين اوصلت
منار : ( بقلبها ) اشفيج يا منار قاعده بشقة شخص غريب توج امس صادفتيه .. الله يسامحك يا أحمد ( حست ان ودها تنفجر و تبجي بس تعوذت من ابليس وقررت تطلع حق علي )
دشت منار الصاله التفت عليها علي وقعد يطالعها ( كان شعرها القصير مبلل ويهها حلو بريء و مافيه مكياج )
علي : ها اشلونج اليوم؟؟ ان شاءالله نمتي عدل؟
منار : ( اقعدت بطرف القنفه ) معني ما اذكر متى نمت بس الحمدلله نمت وارتحت ..
علي : ( يسوي روحه يفكر ويعصر مخه ) نمتي بالظببط يوم البطه السوده تبجي اتدور اهلها
منار : ( تظحك )
علي : ( بقلبه ) حلوه ظحكتها
علي : زين خل اييب الطاوله اللي بالغرفه عشان احط الاكل عليها
منار : لا خلك .. انا اييبها
منار راحت يابت الطاوله ( الكوميدينا الصغيره ) وحطتها جدام علي
علي : ها تسمحيلي اكل معاج؟؟ تره ماتغديت والله
منار : ( تبتسم ابتسامه فيها حزن ) اي اكيد
علي بطل الاكل وقطع لها دياي واهي قاعده تاكل عالبطيئ وتسمعه ياكل و يسولف بس بالها ماكان معاه وسرحانه
علي : ( يحرك ايده جدام ويه منار ) هاا وين رحتي
منار : ( تهد القفشه ) ولا شي بس الحمدلله شبعت
علي : ماكليتي شي؟؟
منار : بلى الحمدلله شبعت .. و مشكور وايد انا لازم امشي الحين
علي : تمشين!! .. وين بتروحين؟
منار : ( تدور اي عذر عالسريع ) بروح بيت رفيجتي
علي : اكيد عندج مكان تروحين له؟؟
منار : ( اوقفت ) اي ويللا انا ماشية
علي : ( وقف معاها ) يللا عيل اوصلج بطريجي
منار : لا لا مابي اكلف عليك انا اروح بروحي
علي : في احد معين بياخذج يعني؟؟
منار : لا ماكو .. بس انا اتصرف انت ماقصرت معاي مشكور
علي : ( قعد عالقنفه واشر لها ) قعدي شوي
منار : ( اقعدت واهي ساكته ماقالت شي )
علي : منار صارحيني ولا تقصين علي .. انا ادري ان ماعندج مكان تروحين له وانج ماتبين تقعدين بشقة شخص غريب عدل ولا لأ؟؟
منار : تهز راسها .. عدل
علي : والله يا منار اني ماراح اضرج بشي وهالشقه اعتبريها لج لين الله يفرجها عليج .. و لو تبيني ما ايي حااضر من عيوني اييب ثلاجه صغيره واعبيها اكل وماي وماتشوفيني واتطمن بالتلفون بس .. زين جذي؟
منار : ( منزله راسها بالارض وتحس بعوار ببلعومها لأنها حابسه دموعها غصب )
منار : لا مابي تسلم ماقصرت بس انا لازم امشي من اهني
علي : زين فرضا سمحتلج وخليتج اتروحين وقعدتي تمشين بالشارع وماعندج مكان محدد تروحين له .. ووقف واحد حقير وركبج معاه غصب واذاج؟؟
منار : ( ارفعت راسها وطالعته بعصبيه وغصب ماسكه البجية )
علي : اي لاتطالعيني جذي انا شاب واعرف ان في شباب وصخين وايد محذفين بالشوارع
منار : ( لفت ويهها عنه عشان لايشوف دموعها ) لا تحاتي ما اركب الا مع مره
علي : ( يظحك ظحكة استهزاء ) لا يعني الحريم الحين مسكتين .. يا كثر ماسمعنا سوالف ان حريم خدروا بنات وودوهم حق رياييل ..
منار : ليش تخوفني اكثر ؟؟ ماحب اسمع جذي كلام
علي : اي لأن هذا الصج
منار : ( انفجرت واقعدت تبجي من قلب )
علي : ( يطالعها ومايدري اشلون يواسيها قعد يدور كلينكس بجيس الاكل وعطاها اياه )
علي : هاج مسحي دموعج ولا تبجين .. انتي اهدي وقوليلي مشكلتج وانا والله مستعد اساعدج على قد ما اقدر
منار : ماتقدر تساعدني محد يقدر يساعدني
علي : انتي بس جربي وقوليلي اشتخسرين
منار : ( تبجي من قلب ) انا.. امي من قبل سنتين (تبجي وتناشق وتمسح خشمها )
علي : لحظة مسحي دموعج وتنفسي ارتاحي بعدين سولفي على راحتج
منار : ( تتنفس وتمسح دموعها ثواني بس وترد تبجي مثل الياهل اللي ضايع من اهله )
علي : لا جذي عيل خلاص يبه هونت مابي اعرف الموضوع .. قومي غسلي ويهج وامشي معاي
منار : ( تحاول تسيطر على نفسها وماتبجي ) ( بصوت مخنوق ..) : وين؟؟
علي : نتمشى اتشمين شوية هوا وارجعج اهني
منار : بس ..
علي : ( يقاطعها ) لا بس ولا شي مابي اسمع اعتراض يللا قومي غسلي ويهج ناطرج
منار دشت الحمام وغسلت ويهها واقعدت اتطالع عيونها بالمنظره كانو متفوخين وحمر من كثر البجي مشطت شعرها باصابع ايدها اساسا اهو كان ناعم بس لأن توه بدى ينشف منه الماي فصاير متعفس شوي
اطلعت من الحمام لقت علي واقف يم باب الشقه وبيده مفتاح سيارته
علي : يللا نمشي؟
منار : يللا
اطلعوا واهو قفل الباب وانزلوا تحت والحمدلله ماصار لهم اي موقف بايخ مثل اللي صار امس
اركبت بالسياره يمه وكل شوي تتلفت
علي : ( لاحظ انها مرتبكه ) لا تخافين ان شاءالله مايصير الا كل خير
علي : ( طلع نظارة شمسية من درج السيارة ) هاج لبسيها شمس الكويت مشكلة
منار : ( خذتها منه والبستها وتمت اتطالعه واهو يسوق من غير لا ينتبه لها )
( علي طويل وعريض.. اسمر حنطاوي شعره اسود حواجبه عراض ومرتفعين مخليته يبين جنه عصبي خشمة مسلول .. و شواربه اخفاف ولحيته ديرتي يعني ملامحه على بعضها ماعطيته جاذبيه غريبه )
منار : وين راح نروح ؟
علي : تبين نتمشى عالبحر؟؟
منار : لا اخاف اشوف احد اعرفه اهناك
علي : زين انتي ماكليتي شي .. امشي انروح نتغدى
منار : لا مو يوعانه كليت
علي : زين انا يوعان اشلون يعني اموت من اليوع ما اكسر خاطرج؟
منار : انت اطلبلك أكل .. انا شبعانه مابي آكل
علي : لا انا خاطري بأبل بيز
منار : اوكي
( أغلب الطريج كان هدوء ومرات علي يقط قطات مليقه يحاول يظحكها بس اهي اغلب الوقت سرحانه بالشارع )
( اوصلوا عند ابل بيز البحر علي سفط السيارة وطالع منار )
علي : يللا مشينا واذا ماتبين تفصخين النظاره خليج لابستها لين نقعد داخل
منار : اوكي